Aurten familia aniztasunaren egutegiak bidali ditugu Bilboko ikastetxeetara, Bilboko Udalaren laguntzari esker. Sehaska osatzen duten familiek egindako egutegia da. Izan ere, Euskadiko haur askoren familia-errealitatea islatzen duen egutegia da. Horrela, txikienek bi amatxuk edo bi aitatxuk, eta amatxu batek edo aitatxu batek osatutako familiak erakusten dizkigute egutegi honetan.
Sehaskatik oso kontziente gara gure familia-ereduak ia ikusezinak direla gure gizartean. Beren ikastetxeetan eta beste esparru askotan (zineman edo literaturan, adibidez) behin eta berriz entzuten dituzten familia-ereduak, hain zuzen ere, ama batek eta aita batek osatutakoak dira. Elkartetik uste dugu garrantzitsua dela gizarte osoak gure familiak ezagutzea, familia-eredu bakoitza eroso eta aske sentitzeko inguruak edo esparruak sortu ahal izateko. Zentzu horretan, gure familiak gizartean legitimatzeko helburuarekin, sentsibilizazio-kanpainak egiten ditugu 2012tik, eta geure burua ikusarazteko lan egiten dugu, gure gizarteak familia-aniztasuna aitortu eta onar dezan.
Gaur, bide horretatik jarraituko dugu, beraz gure seme-alabek egindako egutegien ekimen honekin ikastetxeetara iristeak ilusio berezia egiten digu. Azken finean, beharrezkotzat jotzen dugu ikastetxeetan presente egotea, LGTBIQ+ familia guztien bozgorailu izatea eta ahalduntzea, gizarte honetan ikusezinak ez izateko.
Amaitzeko, eskerrak eman nahi dizkiegu ikastetxeei ekimen hau hartzeagatik; izan ere, Sehaska osatzen dugun familia guztien lehentasunetako bat adin txikiko guztien hezkuntza da, aniztasuna, inklusibotasuna eta errespetua nagusi diren ingurune batean.
